11
ഇസ്രയേല്-ഇറാന് യുദ്ധം: 60 ദിവസത്തിനകം അന്തിമ കരാറിലെത്താന് യുഎസും ഇറാനും തമ്മില് റോഡ്മാപ്പ് രൂപീകരിച്ചു
ലൂസെര്ണ് (സ്വിറ്റ്സര്ലന്ഡ്): പശ്ചിമേഷ്യന് പ്രതിസന്ധി പരിഹരിക്കുന്നതിനായി സ്വിറ്റ്സര്ലന്ഡില് നടക്കുന്ന ഉന്നതതല ചര്ച്ചകളുടെ ആദ്യ ദിനത്തില് യുഎസും ഇറാനും തമ്മില് നിര്ണായക പുരോഗതി. 60 ദിവസത്തിനകം അന്തിമ സമാധാന കരാറിലെത്താനുള്ള റോഡ്മാപ്പിന് ഇരുരാജ്യങ്ങളും അംഗീകാരം നല്കിയതായി മധ്യസ്ഥ രാജ്യങ്ങളായ പാകിസ്താനും ഖത്തറും സംയുക്ത പ്രസ്താവനയിലൂടെ അറിയിച്ചു. ചര്ച്ചകള്ക്ക് രാഷ്ട്രീയ മേല്നോട്ടം നല്കാന് ഇരുരാജ്യങ്ങളും ചേര്ന്ന് ഒരു ഉന്നതതല സമിതി രൂപീകരിച്ചിട്ടുണ്ട്. ഇറാന്റെ ആണവപദ്ധതി, യുഎസ് ഏര്പ്പെടുത്തിയ സാമ്പത്തിക ഉപരോധങ്ങള് എന്നിവ സംബന്ധിച്ച പ്രശ്നങ്ങള് പരിഹരിക്കാന് പ്രത്യേക വര്ക്കിങ് ഗ്രൂപ്പുകള് ഉടനടി പ്രവര്ത്തനം ആരംഭിക്കും. കൂടാതെ, ചരക്കുകപ്പലുകളുടെ സുരക്ഷിതമായ യാത്ര ഉറപ്പാക്കാന് ഹോര്മുസ് കടലിടുക്കില് പ്രത്യേക ആശയവിനിമയ ലൈനും സ്ഥാപിച്ചിട്ടുണ്ട്.
ലെബനനില് വെടിനിര്ത്തല്; അനിശ്ചിതത്വം തുടരുന്നു
ലെബനനിലെ സൈനിക നടപടികള് അവസാനിപ്പിക്കുന്നത് നിരീക്ഷിക്കാന് ഇരുവിഭാഗവും ഒരു ‘ഡി-കോണ്ഫ്ളിക്ഷന് സെല്’ രൂപീകരിക്കാന് ധാരണയായി. ഇറാന്റെ എണ്ണ കയറ്റുമതിക്കുമേലുള്ള ഉപരോധങ്ങള് യു.എസ് താല്ക്കാലികമായി നീക്കിയതായും മരവിപ്പിച്ച ചില ആസ്തികള് വിട്ടുനല്കിയതായും ഇറാന് വിദേശകാര്യ മന്ത്രി അബ്ബാസ് അരാഗ്ചി അവകാശപ്പെട്ടു.
അതേസമയം, നയതന്ത്ര ചര്ച്ചകള് പുരോഗമിക്കുമ്പോഴും ലെബനനിലെ അതിര്ത്തി പ്രദേശങ്ങളില് ആശങ്ക തുടരുകയാണ്. വെടിനിര്ത്തല് പ്രഖ്യാപനത്തിന് തൊട്ടുമുമ്പുള്ള ദിവസങ്ങളില് ഇസ്രയേല് നടത്തിയ കടുത്ത വ്യോമാക്രമണങ്ങളില് നബാതിയ നഗരത്തില് വന് നാശനഷ്ടങ്ങളാണ് റിപ്പോര്ട്ട് ചെയ്തിരിക്കുന്നത്. ആവശ്യമായ സാഹചര്യങ്ങളില് തങ്ങളുടെ സൈന്യം തെക്കന് ലെബനനില് തുടരുമെന്ന് ഇസ്രയേല് പ്രതിരോധ മന്ത്രാലയം വ്യക്തമാക്കിയിട്ടുണ്ട്.
