11
ബെംഗളൂരുവില് ഗുണ്ടാ നേതാവ് രാജ പട്ടാപ്പകല് വെട്ടേറ്റു മരിച്ചു; നടുക്കുന്ന കൊലപാതക ദൃശ്യങ്ങള് പുറത്ത്
ബെംഗളൂരു: നഗരത്തെ നടുക്കി വീണ്ടും ഗുണ്ടാപ്പക. തെക്കന് ബെംഗളൂരു കേന്ദ്രീകരിച്ച് പ്രവര്ത്തിക്കുന്ന കുപ്രസിദ്ധ ഗുണ്ടാ നേതാവ് രാജ (30) ജെ പി നഗറില് പട്ടാപ്പകല് വെട്ടേറ്റു മരിച്ചു. നിരവധി ക്രിമിനല് കേസുകളിലും കൊലക്കേസിലും പ്രതിയായ രാജയെ ജനങ്ങള് നോക്കിനില്ക്കെയാണ് നാലംഗ ക്വട്ടേഷന് സംഘം ക്രൂരമായി വെട്ടിക്കൊലപ്പെടുത്തിയത്. ഗുണ്ടാസംഘങ്ങള് തമ്മിലുള്ള മുന്വൈരാഗ്യവും കുടിപ്പകയുമാണ് കൊലപാതകത്തിന് പിന്നിലെന്നാണ് പോലീസിന്റെ പ്രാഥമിക നിഗമനം.
ചായ കുടിക്കാന് ഇറങ്ങിയപ്പോള് വളഞ്ഞിട്ട് ആക്രമണം
തെക്കന് ബെംഗളൂരുവിലെ അധോലോക പ്രവര്ത്തനങ്ങളിലെ പ്രധാന കണ്ണിയായിരുന്നു കൊല്ലപ്പെട്ട രാജ എന്ന് പോലീസ് സ്ഥിരീകരിച്ചിട്ടുണ്ട്. ജെ പി നഗറിലെ റോഡരികിലൂടെ ചായ കുടിക്കാനായി നടന്നുപോകുകയായിരുന്ന രാജയെ അക്രമികള് നേരത്തെ തന്നെ പിന്തുടര്ന്നിരുന്നതായാണ് വിവരം. ജനനിബിഡമായ റോഡില് വെച്ച് പെട്ടെന്ന് വളഞ്ഞ നാലംഗ സംഘം മാരകായുധങ്ങളുമായി രാജയ്ക്ക് നേരെ തിരിയുകയായിരുന്നു. രക്ഷപ്പെടാന് ശ്രമിച്ച രാജയെ അക്രമികള് റോഡിലിട്ട് ക്രൂരമായി വെട്ടിവീഴ്ത്തുകയായിരുന്നു.
ഭീതി പടര്ത്തി സിസിടിവി ദൃശ്യങ്ങള്
കൊലപാതകത്തിന്റെ നടുക്കുന്ന സിസിടിവി ദൃശ്യങ്ങള് ഇതിനോടകം പുറത്തുവന്നിട്ടുണ്ട്. ആളുകള് നോക്കിനില്ക്കെ രാജയെ ക്രൂരമായി വെട്ടിക്കൊലപ്പെടുത്തുന്നതും, ചോരയില് കുളിച്ചു കിടക്കുന്ന ഇയാളുടെ മരണം ഉറപ്പാക്കിയ ശേഷം അക്രമിസംഘം സമീപത്ത് നിര്ത്തിയിട്ടിരുന്ന ടാക്സി കാറില് കയറി അതിവേഗം രക്ഷപ്പെടുന്നതും ദൃശ്യങ്ങളില് വ്യക്തമാണ്. ദൃക്സാക്ഷികള് വിവരമറിയിച്ചതിനെ തുടര്ന്ന് പോലീസും ഫോറന്സിക് വിദഗ്ദ്ധരും സ്ഥലത്തെത്തി ഇന്ക്വസ്റ്റ് നടപടികള് പൂര്ത്തിയാക്കി.
‘കൊലപാതകത്തിന് പിന്നില് കൃത്യമായ ആസൂത്രണമുണ്ട്. പ്രതികളെയും അവര് രക്ഷപ്പെടാന് ഉപയോഗിച്ച ടാക്സി വാഹനത്തെയും ദൃശ്യങ്ങളില് നിന്ന് തിരിച്ചറിഞ്ഞിട്ടുണ്ട്. പ്രതികള്ക്കായി നഗരത്തിലും പരിസരപ്രദേശങ്ങളിലും തെരച്ചില് ഊര്ജ്ജിതമാക്കി.’ – ബെംഗളൂരു സിറ്റി പോലീസ് വ്യക്തമാക്കി.
പ്രതികളെ എത്രയും വേഗം വലയിലാക്കുന്നതിനായി ഡെപ്യൂട്ടി പോലീസ് കമ്മീഷനറുടെ മേല്നോട്ടത്തില് പ്രത്യേക അന്വേഷണ സംഘത്തെ നിയോഗിച്ചിട്ടുണ്ട്. ബെംഗളൂരു നഗരത്തിലെ ഗുണ്ടാസംഘങ്ങളുടെ സമീപകാല നീക്കങ്ങളെക്കുറിച്ചും പോലീസ് അന്വേഷണം ആരംഭിച്ചു. നടുറോഡില് നടന്ന ഈ അരുംകൊല നഗരവാസികളില് വലിയ ഭീതിയാണ് ഉയര്ത്തിയിരിക്കുന്നത്.
