11
ഉസ്ബെക്കിസ്താനെതിരെ റൊണാള്ഡോ കളിക്കുമോ? സസ്പെന്സ് നിലനിര്ത്തി കോച്ച് റോബര്ട്ടോ മാര്ട്ടിനെസ്
ഹൂസ്റ്റണ്: ലോകകപ്പില് ഉസ്ബെക്കിസ്താനെതിരായ നിര്ണ്ണായക മത്സരത്തില് സൂപ്പര് താരം ക്രിസ്റ്റ്യാനോ റൊണാള്ഡോ സ്റ്റാര്ട്ടിങ് ഇലവനില് ഉണ്ടാകുമോ എന്ന കാര്യത്തില് അനിശ്ചിതത്വം തുടരുന്നു. മത്സരത്തിന് മുന്നോടിയായുള്ള വാര്ത്താസമ്മേളനത്തില് മാധ്യമപ്രവര്ത്തകരുടെ ചോദ്യത്തിന് കൃത്യമായ മറുപടി നല്കാതെ പോര്ച്ചുഗല് കോച്ച് റോബര്ട്ടോ മാര്ട്ടിനെസ് മൗനം പാലിച്ചതാണ് ആരാധകരില് ആശങ്ക കൂട്ടിയിരിക്കുന്നത്. തന്ത്രങ്ങള് കളിക്കാരോട് പറയുന്നതിന് മുന്പ് മാധ്യമങ്ങളോട് വെളിപ്പെടുത്താന് കഴിയില്ലെന്നായിരുന്നു മാര്ട്ടിനെസിന്റെ പ്രതികരണം.
ആദ്യ മത്സരത്തില് കോംഗോയ്ക്കെതിരെ റൊണാള്ഡോ നിരാശാജനകമായ പ്രകടനമാണ് കാഴ്ചവെച്ചത്. മത്സരം 1-1 സമനിലയില് കലാശിച്ചതിന് പിന്നാലെ സോഷ്യല് മീഡിയയിലും കായിക ലോകത്തും താരത്തിനെതിരെ വലിയ വിമര്ശനങ്ങള് ഉയര്ന്നിരുന്നു.
റൊണാള്ഡോയ്ക്ക് പിന്തുണയുമായി പരിശീലകന്
കോംഗോയ്ക്കെതിരായ മത്സരത്തില് ഗോളവസരങ്ങള് പാഴാക്കിയിട്ടും റൊണാള്ഡോയെ എന്തുകൊണ്ട് സബ്സ്റ്റിറ്റിയൂട്ട് ചെയ്തില്ല എന്ന ചോദ്യത്തിന് കോച്ച് മാര്ട്ടിനെസ് നല്കിയ മറുപടി ഇങ്ങനെയായിരുന്നു:
ലോകകപ്പ് പോലുള്ള വലിയ വേദികളില് സമ്മര്ദ്ദങ്ങള് സ്വാഭാവികമാണ്. റൊണാള്ഡോയ്ക്കെതിരെയുള്ള വിമര്ശനങ്ങള് അന്യായമാണ്. കഴിഞ്ഞ 32 മത്സരങ്ങളിലെ കണക്കുകള് പരിശോധിച്ചാല് റൊണാള്ഡോയുടെ പ്രഭാവം വ്യക്തമാണ്. ഗോള് നേടാനുള്ള മികച്ച നീക്കങ്ങള് നടത്തുന്നതില് അദ്ദേഹം ഇപ്പോഴും മുന്നില്ത്തന്നെയുണ്ട്.
അതേസമയം, ഉസ്ബെക്കിസ്താന് പരിശീലകനും മുന് ഇറ്റാലിയന് ഇതിഹാസവുമായ ഫാബിയോ കന്നവാരോ റൊണാള്ഡോയെ കുറച്ചുകാണാന് തയ്യാറല്ല. ‘റൊണാള്ഡോയെപ്പോലെ ഒരു ലോകോത്തര താരത്തെ പെനാല്റ്റി ബോക്സിനുള്ളില് ഒട്ടും തനിച്ചാക്കാന് കഴിയില്ല. ഏത് സാഹചര്യത്തില് നിന്നും ഗോള് നേടാന് ശേഷിയുള്ള താരമാണദ്ദേഹം,’ കന്നവാരോ ഓര്മ്മിപ്പിച്ചു.
ആറ് ലോകകപ്പുകളില് പങ്കെടുത്ത അപൂര്വ്വം താരങ്ങളില് ഒരാളായ ക്രിസ്റ്റ്യാനോ റൊണാള്ഡോ, ഉസ്ബെക്കിസ്താനെതിരെ ഗോള് നേടി വീണ്ടുമൊരു ചരിത്രം തിരുത്താനാകും അടുത്ത മത്സരത്തില് ശ്രമിക്കുക.
